The Vision
منشورِ قلعہ ہستی

تعارف

قلعہ ہستی ایک جامع فلاحی، تعلیمی، روحانی، نفسیاتی، سماجی اور خانقاہی نظام ہے، جس کی بنیاد قرآنِ مجید، سنتِ رسولِ کریم ﷺ، رضائے الٰہی، خدمتِ خلق، خود شناسی، تزکیۂ نفس اور حسنِ اخلاق پر رکھی گئی ہے۔

مقاصد

قلعہ ہستی کا مقصد اللہ تعالیٰ کے ننانوے (99) اسمائے حسنیٰ کی نسبت سے خنجراب سے کراچی تک قلعہ ہستی کے مراکز قائم کرنا ہے۔ ہر مرکز ایک ایسی زندہ خانقاہ ہوگا جہاں قرآن زندگی کی بنیاد، سنتِ رسول ﷺ رہنمائی، ذکرِ الٰہی روح کی غذا، خود شناسی شخصیت کی تعمیر اور خدمتِ خلق عملی زندگی کا مقصد ہوگی。

قلعہ ہستی کے ساتھ قائم ہونے والی پہلی مسجد کا نام "مسجد اللہ" ہوگا، جو اس پورے نظام کا روحانی مرکز ہوگی، جبکہ اس کے بعد قائم ہونے والے مراکز میں مساجد کے نام اسمائے حسنیٰ کی ترتیب کے مطابق، مثلاً مسجد الرحمٰن، مسجد الرحیم وغیرہ ہوں گے۔ اور مسجد کے علاوہ ہر مرکز صرف اور صرف اپنے متعلقہ علاقے کے لوگوں کے لیے مختص ہوگا۔

روحانی تربیت

ہر مرکز میں پنج وقتہ باجماعت نماز، تلاوتِ قرآن، ذکرِ الٰہی، درودِ شریف، دینی تعلیم اور تزکیۂ نفس کا باقاعدہ اہتمام ہوگا، تاکہ ہر شخص اپنے رب سے مضبوط تعلق قائم کرے اور اپنی زندگی کو قرآن و سنت کے مطابق ڈھال سکے۔

خود شناسی اور شخصیت سازی

خود شناسی، کردار سازی، اخلاقی تربیت، اعتماد، احساسِ ذمہ داری اور مثبت شخصیت کی تعمیر پر خصوصی توجہ دی جائے گی، تاکہ انسان اپنی صلاحیتوں کو پہچان کر ایک باوقار اور باعمل زندگی گزار سکے۔

تعلیم، تحقیق اور نوجوانوں کی تعمیر

قرآن و سنت کی تعلیم کے ساتھ جدید عصری تعلیم، ہنرمندی، مطالعہ، تحقیق اور عملی تربیت کا متوازن نظام قائم کیا جائے گا۔ نوجوانوں کی جسمانی، ذہنی اور اخلاقی نشوونما کے لیے بھی خصوصی پروگرام ترتیب دیے جائیں گے۔

نفسیاتی اور جذباتی رہنمائی

ذہنی دباؤ، اضطراب، تنہائی، بے مقصدیت اور دیگر نفسیاتی مسائل کے حل کے لیے روحانی تربیت کے ساتھ نفسیاتی رہنمائی اور جذباتی معاونت فراہم کی جائے گی، تاکہ ہر شخص ایک متوازن اور پُرسکون زندگی گزار سکے۔

دسترخوانِ رزقِ الٰہی اور بنیادی سہولیات

غریب، مستحق، مسافر اور ضرورت مند افراد کو باعزت انداز میں معیاری خوراک، بنیادی طبی سہولیات، ضروری ادویات اور صحت سے متعلق رہنمائی، ماہرین کی نگرانی میں، بلا معاوضہ فراہم کی جائے گی۔

خدمتِ خلق

قلعہ ہستی صرف اپنے مراکز تک محدود نہیں رہے گا بلکہ خود اپنے اپنے متعلقہ علاقے کے ضرورت مند افراد تک پہنچے گا۔ خدمت کی ٹیمیں یتیموں، بیواؤں، بیماروں، معذور افراد، بے سہارا خاندانوں اور دیگر مستحق لوگوں کی عزتِ نفس کا خیال رکھتے ہوئے ان کی معاونت اور رہنمائی کریں گی۔

اتحادِ انسانیت

قلعہ ہستی ہر قسم کے مسلکی، نسلی، لسانی، علاقائی اور سیاسی تعصبات سے بالاتر ہو کر قرآن و سنت کی روشنی میں بلاامتیاز ہر انسان کی خدمت کو اپنی ذمہ داری سمجھتا ہے۔

شعارِ قلعہ ہستی

"قرآن بنیاد، سنت رہنمائی، خود شناسی سے رب شناسی، خدمتِ خلق، صرف رضائے الٰہی۔ اور وطن عزیز ملک پاکستان کی ترقی و سلامتی "

دعا

اللہ تعالیٰ وطنِ عزیز مملکتِ خدا دادِ پاکستان کو صبحِ قیامت تک ہمیشہ آباد، شاد اور سلامت رکھے، اس کی حفاظت کرنے والوں کی حفاظت فرمائے، ہماری اس کاوش کو اپنی بارگاہ میں قبول فرمائے، اور قیامت تک اس کے فیوض و برکات کو جاری و ساری رکھے۔ اور جب تک ہم حق پر رہیں ہماری مدد فرمائے۔
الله أكبر الله أكبر لا إله إلا الله والله أكبر الله أكبر ولله الحمد
پاکستان زندہ باد!
آمین، ثم آمین۔